Ақын өлеңдері жинағы ✍️

Жан-жағыңа қарашы бір,

Қарашы бір, қалқам-ай.

Қазағымның, даласы бұл

Әр ай сайын әр қалай.

Қалай-қалай құбылады

Күн көзімен жер күліп.

Жапырақтар жылынады

Ағаштардан секіріп.

Жапырақтар жасыл, сары,

Қызғылт, күлгін... –  сан түрлі.

Табиғаттың асыл шағы

Күз ғой, шіркін, алтынды.

Шеберлері қылқаламның

Жазып жатыр тамсана.

Мен де сансыз жырлағанмын,

Төктім терді қаншама?!

Жеткізіп тек айта алсам-шы,

Сұлулығы сондай-ау!

Ей, суретші, қайта салшы,

Аз ғой оған он бояу!