Ақын өлеңдері жинағы ✍️

Қумақшы болып мұңды ауыр,

Өрекпи  соқты бір дауыл.

«Жабырқау ғой,- деп – жан мына»,

Жапырақ құлады алдыма.

«Мұңая ма екен адам?!»-деп,

Сипалай берді самал кеп.

«Жұқартқансың ба жүйкеңді?» -

Дегені-ау,

Жел кеп сүйкенді.

Дегендей болып «Тұрсаңшы!»

Тырс етіп тамды бір тамшы.

Көңілге алып ем сәл секем,

 Көзімнен аққан жас екен.

«Неге еңсең түсіп жүр бүгін?»,-

Дей ме екен?

Төкті күн нұрын...

Жағдайымды кеп сұраған

Болған жоқ бақта бір адам.