Қазақтың бақ жұлдызы
Елім деп еңіреген қайран ерім,
Қашанда қазақ қамын ойлап едің.
Ұйқыда жатқан ұлтты «маса» болып,
Оятып, азаттыққа қайрап едің.
Қайрап ең адамдыққа, білімге үндеп,
Тұтатып ар-намыстың шоғын үрлеп.
Түрмеге, айдауға сап «көре алмастар»,
Тірлікте тыным бермей, жүрді күндеп.
Жаныңа жағып күйе қаралады,
«Халықтың жауысың» деп табалады.
Басыңа пәле төнген қиын шақта,
Араша болуға ұлтың жарамады.
Сорың да, бағың болған қазағыңа,
Ұлт үшін күресте түстің өмір азабына
Ар үшін шыбын жанды құрбан етіп,
Төзгенсің НКВД азабына.
Жайратты адасқан оқ, тиіп саған,
Естимін жан айқайын, күйіп барам.
Өмірден ұлт деп өткен ер Ахмет,
Қашанда сенің орның биік маған.
Әлихан, Міржақыптай саңлақтарым,
«Нәубет жыл» қойды жұтып, жалмап бәрін...
Алашта арда туған ақиық асылдарым.
Қорған боп жатсын ұлтқа рухтарың!
Тағдырдың тартқан талай тауқыметін,
Қазақтың бақ жұлдызы – Ахметі.
Мерейтойлық тойыңда тілейміз біз,
Алланың болсын қорған құдіреті!