Әл-Фараби атындағы ҚазҰУ - Қазақстан элитасының шеберханасы
Әл-Фараби атындағы ҚазҰУ - Қазақстан элитасының шеберханасы
Әл-Фараби атындағы Қазақ ұлттық университеті-Қазақстан Республикасының Жоғары білім беру жүйесінің жетекші мекемесі-келер жылы өзінің 90 жылдық мерейтойын атап өтпек. Мол мұралар, оқу және ғылыми жұмыстың көп жылдық тәжірибесі, жоғары кәсіби педагогикалық құрам — осының барлығы университетке ондаған жылдар бойы әртүрлі салаларда үздік мамандар даярлауға мүмкіндік береді.
Университет 1934 жылы 15 Қаңтарда биологиялық және физика-математика факультеттерінің құрамында құрылды, оған С. М. Киров есімі берілді. Университеттің қалыптасуына Мәскеу, Ленинград, Қазан, Украина университеттері көмектесті.
Ұлы Отан соғысы жылдарында 287 студент пен қызметкер (оның ішінде 135 ерікті) майданға аттанды. Отан үшін шайқаста қаза тапқандарды еске алу үшін №4 оқу корпусында "Даңқ" мемориалы салынды.
1941 жылы Қазақ коммунистік журналистика институтының базасында филология факультетінің журналистика бөлімі құрылды. 1948 жылы тарих, геологиялық-географиялық, содан кейін экономикалық факультеттер ашылды. 1955 жылы заң институтының базасында заң факультеті ашылып, физика-математика факультетінен екі факультет-Физика және математика факультеті құрылды. 1968 жылы журналистика және философиялық-экономикалық факультеттер ұйымдастырылды. 1971 жылы университет Еңбек Қызыл Ту орденімен марапатталды.
Айта кетейік, әл-Фараби атындағы Қазақ ұлттық университеті — республикада мемлекеттік аттестаттаудан өткен және барлық мамандықтар мен деңгейлер бойынша білім беру қызметін жүзеге асыру құқығын растаған алғашқы жоғары оқу орны.
Бүгінгі таңда университет-талапкерлерге мамандықтардың кең таңдауын ұсынатын тұтас оқу-ғылыми кешен. Жоо құрамында 16 факультет, 66 кафедра, 30 ғылыми-зерттеу институттары мен орталықтары, технопарк жұмыс істейді.
ЖОО-да 2000-нан астам профессорлар, докторлар, ғылым кандидаттары және философия докторлары, ірі академиялардың 100-ден астам академиктері, Қазақстан Республикасының 30-ға жуық еңбек сіңірген қайраткерлері жұмыс істейді. Мұнда жоғары кәсіптік білім берудің көп деңгейлі жүйесі бойынша 25 мыңнан астам студенттер мен магистранттар оқиды. Университет бірлескен халықаралық оқу бағдарламаларын іске асыру, студенттермен алмасу және тағылымдамалар өткізу бойынша әлемнің жүздеген ірі халықаралық жоғары оқу орындарымен ынтымақтасады.
Сонымен қатар, Әл-Фараби атындағы ҚазҰУ-Қазақстанның жоғары оқу орындары бас рейтингінің көшбасшысы, ел тарихында тұңғыш рет Қазақстан Республикасы Президентінің "Сапа саласындағы жетістіктері үшін" сыйлығының лауреаты, Тәуелсіз Мемлекеттер Достастығы өнім және қызмет сапасы саласындағы жетістіктері үшін сыйлығының дипломанты. Университет Халықаралық университеттер қауымдастығының мүшесі және Еуразиялық университеттер қауымдастығының тең құрылтайшысы бола отырып, Қазақстан мен Орталық Азия елдерінің ЖОО-лары арасында бірінші болып Болонья қаласында Университеттердің Ұлы Хартиясына қол қойды, сапа менеджменті жүйесінің халықаралық стандарттарының талаптарына сәйкестігіне Халықаралық сертификаттаудан сәтті өтті және ірі әлемдік сертификаттау орталықтарының куәліктерін алды.
Университет жоғары білікті мамандарды даярлауға, әлемдік білім беру кеңістігіне одан әрі интеграциялауға, іргелі және қолданбалы зерттеулерді дамытуға, оларды өндіріске енгізуге бағытталған орасан зор білім беру, ғылыми, рухани-тәрбиелік, инновациялық және өндірістік әлеуетке ие.
ТОЛЫМБЕК ҚАЗЕЗ
Әл-Фараби атындағы ҚазҰУ 1-курс магистрнаты,
Ғылыми жетекшісі: т.ғ.к., доцент Қартабаева Е.Т.