Шағбан айын Рамазанға дайындық айы деуге болады. Бұл айда мұсылмандар Рамазанды бос өткізіп алмаудың қамын жасағаны жөн. Ораза басталып кеткеннен кейін де "Түкірік жұтуға бола ма?", "Тіс пастасын қолдану оразаны бұза ма?" деген сынды сұрақтар жиі қойылады. Шағбан айы осы сұрақтарға жауап іздеп, рухани және физикалық дайындықты күшейтетін уақыт. 

Рамазан айына жоспар құрып, ораза уақытында қайда болатыныңыз және немен айналысатыныңызды нақтылаңыз. Қазірден бастап қайырымды істердің тізімін жазып, оған қажет қаражат, дүние-мүлікті түгендей беріңіз. Бес уақыт намазыңызды барынша мешітте, ең болмағанда жамағатпен өткізуді дағдыға айналдырыңыз. Шағбай – барынша ораза ұстап, құлшылық жасап, Құран Кәрім сүрелерін көп оқып, жаттайтын, мұқтаждарға садақа беретін ай.