Ақын өлеңдері жинағы ✍️

Тіріде әкім төрде,

Көп оған жақын пенде.

Аты озып тұрған кезде

Танытар атын да елге.

Отырмас ақын төрде,

Босаға жақын кейде.

Жыр менен ақыл іздер,

Жүрсе де тақыр жерде.

Деу қиын: бәрі жаман,

Біреудің бағы жанар.

Мұра боп кейінгіге

Әкімнің тағы қалар.

Өлеңсіз бақ қонбайды,

Ойланбас қақ төр жайлы,

Әкімнен айырмасы –

Ақында тақ болмайды.

Тіріде әкім төрде,

Көп оған жақын пенде.

...Кірсе де ақыр көрге,

Өлген соң

Ақын төрде.