Ақын өлеңдері жинағы ✍️

Сүю - заңым,
Сүю - және арманым,
Сүю - менің қиялымның шарлауы.
Сүйе алмасам ештеңені, ешкімді,
Жүрегімнің онда соқпай қалғаны.

Күту - заңым.
Тағат таппай күткенім -
Келер күннің құпиясы,
Бүккені.
Күте алмасам ештеңені,
ешкімді,
Онда менің өмірімнің біткені.

Махаббат бар мұңаю мен күлкімде,
Мен күтусіз батқан емес бір Күн де.
Қара жерге ноқат болып түскенше,
Сүймей, күтпей өмір сүру мүмкін бе?!