6 Шілде - Нұр-Сұлтан қаласы күні (Астана – жас қала)

Еңселі Елорда, асқақтаған Астана еркелеп аққан Есілдің жағалауында орналасқан. Бүгінде әсем қала Астанамыз жылдан жылға көркейіп өсіп келеді. Биыл қазақ жұрты осы әсем қаламыздың құрылғанына 17 жыл толған мерейлі тойына қызу дайындалып жатыр.

Осыдан 17 жыл бұрын ел Президенті Нұрсұлтан Назарбаевтың 1997 жылғы қазандағы Жарлығымен Ақмола қаласы 1997 жылдың 10 желтоқсанынан бастап Қазақстанның астанасы болып жарияланған. Ал 1998 жылдың 6 мамырында Ақмола атауы Астана болып өзгертілді. Астана қаласының қазақ елінің жаңа астанасы ретінде халықаралық таныстырылымы 1998 жылдың 10 маусымында өтті. Бүгінде Астана күні 6 шілдеде аталып өтіледі. Өйткені дәл осы күні Қазақстан республикасының Жоғары кеңесі астананы Алматыдан Ақмолаға ауыстыру туралы шешім қабылдаған болатын. Бұл күн қазіргі уақытта мемлекеттік мереке болып саналады.

Қазіргі таңда халық Астананы тамашалап, қызықтап, кең көшелермен қаланы саяхаттап жүреді. Тіпті шет елдерден келген қонақтар қаламыздың көркем жерлерін аралап, тамсанып мақтау айтып кетіп жатыр. Бас қаламыз Астананың сәулет өнері арқылы қаламызда әсем, зәулім көз тартар биік ғимараттар бой көтеруде. Жаңа әрі озық үлгідегі тамаша тұрғын-үй кешендері, әкімшілік ғимараттары, гүлзарлар мен субұрқақтар, әдемі монументтер мен сәулет ескерткіштері және де жастар ойын-сауық кешендеріде бар.

Міне, Есілдің сол жағалауында жапырағын жайып, жас қаланың жасыл ағашы Бәйтерек тұр. Ол жан-жағына нұрын төккен алып шарды биікке көтеріп, өмір мен бейбітшілік символын күллі әлемге паш етіп тұр. Ал Президент Ақордасының төбесінде ұлттық жалауымыз желбіреген, киіз үй сипатты зор күмбез баршамызды бейбітшілікке, ауызбіршілікке шақыратындығын білдіреді. Сондай-ақ, Л.Гумилев атындағы Еуразия Ұлттық Университеті, «Ел анасы» монументі, «Астана-Арена» спорт кешені, Қазақстан Ішкі істер министрлігінің зәулім ғимараты, «Хан шатыр», «Керуен», «Мега», тағы басқа ойын-сауық орталықтары, «Бәйтерек», «Бейбітшлік және келісім сарайы», «Тәуелсіздік сарайы», «Конгрес Холл», «Астана Опера» мемлекеттік опера және балет театры Астананың сәнін келтіреді.

Астана – тек біздің ғана емес, дүние жүзіне зиялылық нұрын төгетін Еуразияның, әлемнің сәулетті қаласына айналып отырған ғажайып шаһар.

Бүгінде Астана түрлі халықаралық деңгейдегі шараларды өткізетін орталыққа айналып үлгерді. 2010 жылы Елордада 11 жылдық тоқыраудан кейін ЕҚЫҰ саммитін ұйымдастырып, өте жоғары деңгейде өткізді. Сонымен қатар, VII қысқы Азиада ойындары да жоғары талапқа сай ұйымдастырылды.

Келешекте, Астана 2017 жылы өткізілетін «ЕХРО-2017» көрмесін өткізу құрметі де Астанаға берілді. Қазіргі таңда осы Халықаралық мамандандырылған көрмені жоғары деңгейде өткізуге дайындық жүріп жатыр.

Міне, жастарымызды болашаққа бастайтын бас қаламыз, арман қала – жас қаламыз – өнер, білім мен мәдениеттің ғылымның ордасына айналуда. Жасыл қала – бас қаламыз Астана жайнай берсін!