Қаза, ажал, өлім

12.05.2020

Қайғылы сөз
Қаза үстінде туады.
Қаһарлы сөз
Жаза үстінде туады.

Қазаға - сабыр жолдас.

Ауырлықты жер көтерер,
Ауыр қазаны ер көтерер.

Қатын оңса - қазына, оңбаса - қаза.

Ерлік қаза- өлтірмейді,
Ел көңілінен кетірмейді.

Құмырсқа қаза табарда,
Қанат тағады.

Жан бар жерде – қаза бар.

Ажалды жылан, жол үстінде жатады.

Ажал келмей жан шықпас,
Қысыр сөзден мән шықпас.

Айдалада атқан оқ
Ажалдыға тиеді.

Ажал ажарыңа да қарамайды,
Базарыңа да қарамайды.

Біреудің ажалы оттан,
Біреудің ажалы судан.

Тәуекел ет те тас жұт,
Ажал жетпей өлмек жоқ.

Қырық жыл қырғын болса да,
Ажалды өлер.

Ажалды киік ашыққа қашады.

Сынбайтұғын шөлмек жоқ,
Ажал жетпей өлмек жоқ.

Ажалдан ақша беріп құтылмас.

Ажалдан ақырет артық.

Түлкінің ажалына құйрығы кінәлі.

Екі ауру бір келсе, ажалдың жеткені,
Екі борыш бір келсе, абыройдың кеткені.

Ұйқы — ажал ағайыны.

Атқыштан ажал қашады.

Кездейсоқ ажалды
Аңғырттық шақырады.

Жауынгердегі қол күрек
Ажалды алыстату үшін керек.

Ажал ақмақ үшін алтау.
Ақылды үшін біреу.

Жыл ұлық емес,
Ажал – ұлық.

Ажал анық болса да,
Мезгілі жетпей ер өлмес.

Ажал жетсе, ай да өледі,
Күні туса, күн де өледі.

«Ажалсыз адам өлмес» деп,
Жыланды құйрығынан ұстама.

Ажалсыз балық құрғақ жерде де өлмейді.

Ажалы жеткен тышқан
Мысықтың ернін тартып жатады.

Болжалсыз таң атпайды,
Ажалсыз жан шықпайды.
Құдайдың бұйрығынан басқа
Құмырысқаның аяғы сынбайды.

Ажалды киіктің
Аяғы тыныш жатпайды.

Қайрат деген қыран бар
Өлімге күш бермейтін.

Жалаң бұттың өлімі шөптен,
Жалаң сөздің өлімі көптен.

Өлген — моладан қорықпайды.

Қатыны өлген мен байы өлген қосылса:
Күндіз екеу,
Түнде төртеу.

Кісі өлтіретін пышақты
Кісі көрмейді.

Өзің өлсең өл,
Жолдасыңды жауға берме.

Байды өркөкіректік өлтірер.

Тіріде сыйласпаған,
Өліде жыласпайды.

Көшемін деп отыныңды тауыспа,
Өлемін деп азығынды тауыспа.

Өнерге өлім жоқ,
Жалқауға жарық жоқ.

Тасты жапалаққа ұрсаң да жапалақ өледі,
Жапалақты тасқа ұрсаң да жапалақ өледі.

Өлімге төзгенге
Безгек түк емес.

Сенен де өлемін,
Сенімен де өлемін.

Кемпірі өліп еді,
Кекірігі де таусылды.

Зымыраған ғұмырға адам тоймас,
Мәңгі сүрмес, бір күні өлмей қоймас.

Қыбырсыз жатып өлгенше,
Қыбырлап атып өл.

Болар-болмас өліпті,
Ат шаптырып қойыпты.

Жапалақты таспен ұрса да,
Жапалақ өледі.
Жапалақпен тасты ұрса да,
Жапалақ өледі.

Дұшпанға өлім тілегенше,
Өзіңе өмір тіле.

Елшіге өлім жоқ,
Күлде көмір жоқ.

Адам бір оқтық, өлтіру оңай,
Бірақ мың адам бір адамды тірілте алмайды.

Ажал анық болса да,
Мезгілі жетпей ер өлмес.

Біліксіз кісі ауру іспетті,
Ауруды емдемесе, тез өледі.

Қарап көріңіз 👇

kz | Мақал-мәтелдер

Автор: nurgul95

Пайдалы сілтемелер:
» Туған күнге 99 тілектер жинағы: өз сөзімен, қысқаша, қарапайым туған күнге тілек
» Абай Құнанбаев барлық өлеңдер жинағын жүктеу, оқу
» Дастархан батасы: дастарханға бата беру, ас қайыру